صباح الخير
.......................................
في مرة ما من المرات إياها انطردت من الوظيفة اللي كنت فيها
إحساس باليأس والإحباط
ازاي هادفع فاتورة الموبايل !!!
ازاي هاجيب بنزين العربية !!!
بصراحة مش عارف إيه ده
وأنا ماشي في الشارع كده وعلى حين غرة
شفت لوحة من بعيد
الحمد لله ايه ده ده قهوة حياتي اللي باسافر عشان أشربها دلوقتي قدامي
فكرت تفكير عميق خد وقت طويل " 30 ثانية كده "
وقلت طب مانا ممكن أدخل أشوف
ممكن أشتغل هنا !!
دخلت من الباب
احم احم سلامو عليكم ..
ردت بطلاقة غريبة وعليكم السلام
فقلت : هل يا ترى ممكن أتكلم مع حضرتك
قالتلي : اتفضل
قلتلها أنا طالب في كلية صيدلة .. عندي خبرة موسيقية كويسة
بألحن وباكتب وبأعزف 4 الات ..
ردت بوجه مسبهل وايه دخلي أنا ده كافيه يا سنيور لو حضرتك شفت اللوحة بره مش فرقة الفنون الموسيقية..
قلتلها وعندي خبرة طويلة في القهوة وأنواعها وكده ..
قالتلي :ازاي !!
قلتلها :بأشربها..
قالت يا سلام بنظرة من الحنق والغضب.. انتا هتهزر معايا يا حضرت
قلتلها والله يافندم أنا كان نفسي أشتغل هنا ... هل من اممكن ولا ؟؟
قالتلي تعرف تشتغل على الماكينة اللي هناك دي
قلتلها باين مش دي بتاعت الاسبرسو والكابتشينو باين...
قالتلي : مانت فالح أهوه...
قلتلها طب حضرتك وافقتي ولا لأ ...
قالتلي: مش لما نعرف اسمك الأول " بايحات وش بتقول ايه اليوم اللي ما طلعتلوش شمس ده"
قلتلها :ليو ... ليو روميو يافندم
قالتلي : وأنا ايفن ... صاحبة الكافيه... ويستحسن يعني تشتغل كويس عشان الموضوع مش ناقص ...
قلتلها تحت أمرك يافندم...
وانطلقت سريعا عشان أغير هدومي ونلبس اليونيفورم
شكلي يجنن فيه مش كده..
قالتلي ليووووووووووو
قلتلها : أيوه جاااااي
قالتلي ده كافيه يا محترم مش قهوة بلدي خد بالك من أسلوبك
المهم أنا كنت بأناديلك ليه
أيوه صحيح عشان أعرفك على بقيت ال crew
قلت يا أهلا وسهلا عرفيني ...
