دقت سمسمية :: ليو ::

يا سلام أهو كده الواحد لقى وظيفة ربنا يكرم بقى قال الكام ده الشخص اللي هوا أنا مبسوطا سعيدا

هوا صحيح شكل صاحبة الكافيه ميطمنش بس ربنا يستر ونعمر

جريت من على سريري أوبا الساعة بقيت ثمانية ونص ولازم ألحق أوصل قبل الساعة سبعة

جريت وظبطت نفسي ونزلت جري من البيت وصلت تقريبا تسعة وخمسة وألاقي اللي مقابلني في وشي

قلتلها صباح الخير يافندم

ردت ما بدري يا أستاذ ده انتا ما كملتش أسبوع في الشغل وبتتأخر

بيني وبين نفسي "ماكانوش 5 دقايق عمي"

وجريت لبست اليونيفورم

واقف جنب "على ما تفرج" جوه ف بقولها هيا مالها صاحبة الكافيه دي

قالت لأ هيا كده خلقة ربنا متقلقش هتتعود

سكت وطبعا لازم أسكت حكم القوي

وجرينا نشوف الأوردرات

.........................


في منظر شاعري جميل

قاعدة السيدة الفاضلة إيفن هانم صاحبة الكافية

بنظرة غريبة للتلفيزيون اللي بينقل حفلة من الأوبرا

الواحد بينه وبين نفسه مش مصدق " هيا بتسمعها ليه هل هي نوبة ثقافة فجائية ولا هيا شايفة ما وراء الطبيعة ومش شايفة التلفزيون "

وأنا سارح بخيالي سمعت صوت من بعيد بينادي

يا ليووووووووو

الصوت مش غريب لأ فعلا مش غريب

اه ده صوت السيدة فاضلة صاحبة الكافيه" استر يا رب "

انطلقت مهرولا بدل ما عفاريتها تطلع علينا

نعم يافندم "في نبرة احترام غريبة "

قالتلي مش انتا عامل فيها مزيكاتي

تنحت أنا تتنيحة غريبة "يعني ايه يافندم"

قالتلي بتفهم في المزيكا يعني

قلتلها اه فعلا

قالتلي طب ايه البتاعة اللي شغالة دي

قلتلها بتاعة ايه

قالت البتاعة اللي بيعزفوها دي

قلتلها السيمفونية

قالتلي بلا سيمفونية بلا حنفية اسمها ايه وخلاص أصلي بأسمعها كتير أوي

قلتلها فعلا هيا مشهورة اسمها سيمفونية شهر زااد كل المصريين عارفين أولها

مشهورة بسلاستها وتنوع الالات الموسيقية اللي فيها

ونمطها اللي مايل للأندلسي في بعض الأحيان

كأن صورة عربية من العصور الوسطى بتترسم قدامك

قالتلي لأ فعلا !! طب مين اللي مألفها طالما انتا جامد كده

قلتلها اللي كتبها composer روسي إسمه ريميسكي كورزاكوف

قالت لأ ده حقيقي راجل محترم ..

اه كنت عاوزة أسألك عن حاجة تانية هيا ايه البتاعة الكبيرة اللي ورا دي


قلتلها دي آلة وترية

قالتلي مانا عارفة انها الة وترية أومال ايه كل الأوتار اللي فيها دي يعني أنا بأسألك إسمها إيه

قلت بشيء من الحنق : اه عندك حق دي اسمها هارب

الهارب ده بقى يعتبرأقدم الالات الوترية على الاطلاق

والة مصرية قديمة

قالت : فرعونية يعني

قلتلها بشيء من التناحة :أومال مملوكية طبعا فرعونية

بصيتلي بصة من بتوعها اياهم وكأنها بتقول في سرها " يا رب صبرني "

قالت المهم كمل

قلتلها الالة دي اللي في منها دلوقتي الالة السواحلية المشهورة اللي هيا السمسمية

صحيح الهارب الكامل ده بيدي تون أعلى

بس السمسمية كأنها بتضرب على أوتار القلب بتدي فرحة جميلة

ردت بشيء من التجهم طب نعملك إيه يعني

انتا هتقعد تحكي معايا يلا روح شوف شغلك واعملي واحد دبل اسبرسو بسرعة

مشيت وأنا بأقول يا رب ارحمني براحمتك وبنغمة صوت تدي على واحد متضايق حاضر..

قالتلي اه متنساش تجيب السيمفونية دي Cd عشان نبقى نشغلها في الكافيه

قلتلها بحيث الناس تحس انها داخلة مغارة علي بابا يعني "من زهقي "

قالتلي مش قلتلك هاتها ومالكش دعوة

قلتلها تحت أمرك يافندم

و رحت على جوة أقول ايه بس اللي جبرني على الشغلانة المنيلة دي



ما هو صحيح

أكل العيش مر

...............................................................

قلت برده لو حد من زباين الكافيه حب يسمع السيمفونية " اللي السيدة الفاضلة بتسميها بتاعة "

ماتغلاش عليكم

شهرزاد لريميسكي كورزاكوف